Bus grinanada: 7 sugatan

MANILA, Philippines - Pito-katao ang iniulat na nasugatan makaraang bombahin ng mga di-kilalang kalalakihan ang isang bus na pag-aari ng Phil. Fisheries Development Authority (PFDA) sa kahabaan ng Tetuan Highway sa Barangay Tetuan, Zamboanga City kahapon ng umaga. Kabilang sa mga biktimang nasugatan ay sina Luciano Gelaga, Ombre Hamsirani, Orly Villareal, Emil Anita, Jaafar Hassan, Emil Anitan at si Eugene Lozano na pawang kawani ng Sangali Fishing Corporation.  Sa police report na nakarating kay P/Senior Supt. Edwin de Ocampo, hinagisan ng granada ang bus (SCN-997) na minamaneho ni Jaime de la Rosa kung saan nasugatan ang mga lulan nito na papasok sana sa trabaho. Sinisilip ng pulisya ang anggulong pangingikil ang isa sa motibo ng pagpapasabog.