MANILA, Philippines - Dalawang negosyante kabilang ang isang Intsik ang nasawi matapos pagbabarilin ng hindi pa nakilalang motorcycle riding-in-tandem na mga armadong salarin sa magkakahiwalay na insidente sa Brgy. Victory Norte, Tuguegarao City, Cagayan at Cabanatuan City, Nueva Ecija kamakalawa.
Ayon sa Tuguegarao City Police, patay ang biktimang si Jaime Go, 68 anyos at isang prominenteng negosyanteng Intsik matapos na pagbabarilin ng riding-in-tandem na mga salarin sa Brgy. Victory Norte ng lungsod ng Tuguegarao kamakalawa.
Kasalukuyang minamaneho ng biktima ang kaniyang kotse na bumabagtas sa lugar ng ratratin ng riding in tandem pagtapat sa lugar. Ang biktima ay dead-on-the-spot sa tinamong mga tama ng bala sa dibdib.
Iniulat naman ng Cabanatuan City Police ang pagkamatay ng 49 anyos na negosyanteng si Elena San Agustin, 49 na pinagbabaril sa ulo sa kaniyang tahanan sa Brgy. Buliran ng lungsod kamakalawa bandang alas-7:20 ng gabi.
Ayon sa ilang testigo, nasa hardin ang ginang at nagpapahangin ng pagbabarilin ng riding-in-tandem na tumapat sa bakuran ng tahanan ng biktima. Ang mga suspek ay mabilis na tumakas nang masigurong napuruhan ang target.
Patuloy naman ang imbestigasyon ng pulisya sa motibo ng pamamaslang sa dalawang negosyante.