CEBU CITY , Philippines – Masyadong maaga ang salubong ni kamatayan laban sa 3-anyos na totoy matapos itong makurÂyente sa washing machine sa loob ng kanilang bahay sa Sitio Sibagay, Barangay Cantabaco sa Toledo City, Cebu noong Biyernes. Naisugod pa sa Toledo City Hospital, subalit idineklarang patay si James Caryl Reyes Camocamo. Sa ulat ni SPO1 Thule Tahadlangit, nagising ang biktima kung saan lumapit sa pintuan ng kanilang bahay na kinalalagyan ng washing machine. Dito nahawakan ng biktima ang talop na linya ng kuryente ng washing machine na nakaligtaan naman ng kanyang mga magulang na alisin ang plug. Nagkikisay ang biktima kung saan nagising naman ang kanyang mga magulang at naisugod sa ospital. Pinag-aaralan naman ng pulisya ang pananagutan ng mga magulang sa pagkamatay ng kanilang anak dahil sa kapabayaan.