BATANGAS, Philippines - Patay ang 32-anyos na pulis makaraan itong makuryente sa loob ng kampo ng pulisya sa bayan ng Nasugbu, Batangas kamakalawa ng gabi. Sa ulat ni Batangas PNP director P/Senior Supt. Rosauro Acio, kinilala ang nasawing biktima na si PO2 Carlo Bryan Laid, nakatalaga sa Nasugbu PNP. Sa ulat ni P/Supt. Jeremias Aglugub, hepe ng Nasugbu PNP, abala si PO2 Laid sa isasagawang powerpoint presentation nang biglang mag-brownout sa Camp Jose Razon sa Barangay Bilaran bandang alas-9:30 ng gabi. Dahil dito ay nagtungo ang biktima sa guardhouse upang ayusin ang linya ng kuryente. Gayon pa man, biglang nabagsakan ng live wire ang biktima na nagkataon namang nagkailaw kaya nakuryente ito. Nagawa pang maisugod sa pagamutan subalit idineklarang patay ang biktima.