BULACAN , Philippines – Napaslang ang dating pulis at kaibigan nitong barangay kagawad makaraang pagbabarilin ng riding-in-tandem sa loob ng videoke bar sa Barangay Salangan sa bayan ng San Miguel, Bulacan kamakalawa ng gabi.
Nagtamo ng walong tama ng bala sa iba’t ibang bahagi ng katawan ang mga biktimang sina ex-SP03 Danilo Gatmaitan, 51, biyudo at Kagawad Ferdinand Sanguyo, 55, kapwa nakatira sa Barangay Camias.
Sa ulat ni P01 Venancio Buquel, magkasamang nag-iinuman ang mga biktima sa 25th Ave. Bar and Grill nang lapitan at ratratin ng dalawang nakamotorsiklo. Pinaniniwalaang may bahid-politika ang pamamaslang sa dalawa dahil kapwa tagasuporta ng kandidato sa mayoralty race sa 2013 mid term elections habang patuloy naman ang imbestigasyon.