MANILA, Philippines - Brutal na kamatayan ang sinapit ng mag-asawang matandang negosyante matapos pagbabarilin sa loob ng kanilang tahanan ng mga armadong kalalakihan sa Barangay Guadalupe, Carcar City, Cebu, ayon sa ulat kahapon.
Kinilala ang mag-asawa na sina Renerio Neri, 83; at Dolores Neri, 82, na nagmamay-ari ng 9 pampasaherong jeepney na pinamamahalaan ng kanilang pamangkin sa Cebu City.
Sa pagsisiyasat ni PO2 Rosendo Binondo pasado alas-4 ng hapon noong Linggo nang madiskubre ang bangkay ng mag-asawa sa loob ng kanilang tahanan sa Sitio Sanggi sa nasabing barangay.
Ayon sa pulisya, ang mag-asawa partikular na ang lalaki ay kilalang faith healer sa nasabing barangay at nagmamay-ari ng lupain sa Carcar City at sa bayan ng Alcoy subalit hindi sila nasangkot sa land dispute.
Ang bangkay ng mag-asawa ay unang nadiskubre ng pamangkin ni Dolores na si Gloria Alfafara matapos nitong mapansin bukas ang ilaw sa labas ng bahay bandang alas-8 ng umaga.
Pagsapit ng alas-4 ng hapon ay nagtataka siya kung bakit hindi lumalabas ng tahanan ang mag-asawa kaya napilitan itong mag-usisa kasama ang kapitbahay na si Ismael Aldebera, 60 kung saan nagimbal ang dalawa sa nadiskubre.
Posibleng noong Biyernes pa ng gabi o noong Sabado ng madaling araw pinaslang ang mag-asawa base sa pagkatuyo ng dugo habang narekober din ang tatlong basyo ng cal. 9mm pistol.
Nabatid pa na nagkalat sa silid ng mag-asawa ang mga papeles kung saan posible umanong may hinahanap na importanteng dokumento ang gunmen. Freeman News Service