BULACAN, Philippines – Sa ikatlong pagpapakamatay ay hindi na nakaligtas kay kamatayan ang 37-anyos na misis matapos itong tumalon sa malalim na ilog sa Barangay Longo sa bayan ng Pulilan, Bulacan kahapon ng umaga. Hindi na naisalba pa ng mga sumaklolong tauhan ng Pulilan rescue team ang biktimang si Leonora Rehawi ng Barangay Lugam sa Malolos City. Sa imbestigasyon ng pulisya, huling namataang buhay ang biktima na nakatayo sa gitna ng tulay kung saan bigla na lamang tumalon sa may 30 metrong lalim na ilog. Ayon sa kapatid na si Christopher Estrella, unang nagpatiwakal ang kanyang utol sa ilog ng Calumpit noong Oktubre ngunit nasagip ng pulisya. Nasundan pa ito noong Sabado kung saan tumalon naman ang biktima sa ilog ng Pulilan subalit nasagip din. Subalit sa ikatlong pagkakataon ay hindi na ito sinanto ni kamatayan.