CRMC mibihag sa UP Cebu alang sa unang daog

Magis Eagles midominar sa Baby Cheetahs sa CESAFI

CEBU, Philippines — Ang Cebu Roosevelt Memorial Colleges (CRMC) Mustangs milusad og mainit nga ataki sa naghinapos nga bahin sa duwa aron bihagon ang University of the Philippines (UP) Cebu Fighting Maroons, 78-71, alang sa una nilang daog sa Cebu Schools Athletic Foundation, Inc. (CESAFI) Season 24 basketball tournament niadtong Huybes sa gabii, Oktubre 3, didto sa Cebu Coliseum.

Si Keaton Clyde Taburnal halos nag-inusarang mi-agak sa Mustangs batok sa Fighting Maroons uban ang 26 puntos, siyam ka rebounds, usa ka assist, ug duha ka steals.

Nakuha ni Taburnal ang sobra katunga sa iyang iskor gikan sa free-throw line diin siya mipasud og 14 sa 18 niya ka itsa.

Mihimo sab og kasikas si Dale Andre Clark Otero nga mihipos og 10 puntos ug lima ka rebounds alang sa CRMC.

Sila si Redjhee Recimiento, Jhaylord Castro, ug Jonathan Vanguardia dako sab og naambag human sila nagkumbinar og 26 puntos aron tabangan ang Mustangs pagpakgang sa duha ka sagunson nilang pilde. Ang UP Cebu maoy mitali sa nag-unang siyete puntos sa duwa apan ang CRMC dali nga miresbak aton tablahon dayon ang iskor, 9-9. Sikit na nga kumbati ang nahitabo sunod.

Ang Fighting Maroons katapusang miabante sa iskor nga 70-68 gumikan kay ang Mustangs midagkot og nagkayong 7-0 rally aron ilogon ang labaw, 75-70,sa hingpit sa hilimatyong segundos. Sa kinatibuk-an, ang Mustangs miwani sa Fighting Maroons, 18-9, sa pinal nga sayes minutos.

Si Kent Joshua Cabanlit miposte og double-double nga 18 puntos ug 12 ka rebounds samtang si Jose Zaldy Dizon mikolekta og 14 putnos, upat ka rebounds, lima ka assists ug upat ka steals apan nakawang ang impresibo nilang salida gumikan kay ang Fighting Maroons nahisukamod sa unang higayon.

Sa laing bahin, ang two-time defending champion Sacred Heart School-Ateneo de Cebu (SHS-AdC) Magis Eagles mirehitro sa una nilang daog human gilat-an ang Benedicto College Baby Cheetahs, 78-52.

Si Alden Paul Cainglet mitali og 15 puntos, lima ka rebounds, duha ka assists ug duha ka steals alang sa Magis Eagles nga dali nakabangon human sila mahagba sa mga kamot sa University of San Jose-Recoletos (USJ-R) Baby Jaguars, 71-75, sa miaging semana.

Si Rodolfo Froilan Maglasang miamot og 11 puntos, tulo ka rebounds, tulo ka assists ug duha ka steals samtang si Lian Kent Basa midugang og 10 puntos, walo ka rebounds, tulo ka assists, duha ka steals ug usa ka block alang sa Magis Eagles, nga migamit sa nagbaga nilang 31-19 run sa ikaduhang kuwarter aron pabaragon ang Baby Cheetahs sa nahibling bahin sa duwa.

Sila si Joseph Carl Demaclid, John Kenneth Bihag ug Kyle Andre Nalisa nagkumboya'g 31 puntos apan nangahoyhoy ang ilang abaga gumikan kay ang Baby Cheetahs nagpabiling bokya human sa upat ka duwa.