Pilde na si VP Sara
Naa na unta. Pero dili pa maablihan. Sunod semana pa hukman sa Senate impeachment court kon ablihan na bang financial records ni Bise Presidente Sara Duterte. Nga gisumiter sa mga bangko, sa Anti-Money Laundering Council (AMLC) ug sa Bureau of Internal Revenue (BIR).
Ambot kon nagbotasyon bang senator judges. O pasagdan nila si Presiding Officer Chiz Escudero paghukom kon hatagan na ba og kopya ang prosekusyon ug ang depensa. O paabuton pang 10 ka adlaw nga lugway nga gihangyo sa pipila ka mga bangko sa pagsumiter sa tanang gisupina nga mga dokumento.
* * *
Maablihan na bang records unya sa Lunes? O magpaabot pa ta sa ikaduhang semana sa Agosto? Nakaseguro ko nga ang pipila ka adlaw nga kalainan dili igsapayan sa mga nagsunod sa kontrobersiya sa katigayonan sa mga Duterte.
Kay 10 ka tuig ang nilabay, dihang unang giluwatan ni kanhi Senador Antonio Trillanes ang pasangil nga dunay P2.4 bilyones ang mga Duterte sa bangko, walay nagtuo nga moabot ning adlawa. Samang walay nagpaabot nga mapriso si kanhi Presidente Rodrigo Duterte sa The Hague ug ma-impeach og kaduha ang iyang anak.
* * *
Masabot ang kamabinantayon sa Senado. Nagkinto sa tanan nilang lakang. Aron dili makakita og rason ang Korte Suprema, bisan kapila pa magpalaban ang kampo ni VP Sara, pagpanghilabot na sab sa ilang eksklusibong gahom paghimo sa impeachment trial.
Maong wala isupina ang dollar accounts sa mga Duterte, niinsistir nga pangayuon sa BIR ang pagtugot sa presidente sa pagsumiter sa income tax returns ug niklaro nga ang supina dili garantiya nga ang mga dokumento dawaton isip ebidensiya batok ni VP Sara.
* * *
Sayop si VP Sara kon nituo sa ulog-ulog ni Escudero (nga hangtod karon gidudahang naa kapusta niya). Tugotan sa mayoriya sa senator judges (bisan molikoy si Escudero) ang pagpresentar sa iyang financial records atol sa husay.
Kon wala pang kabantay si VP Sara nga pilde na siya, kuwang siya og pagtuon (sama sa ka-wala niyay alamag sa Pax Silica). Kay kon mabisto na diin gikan, asa padulong ug unsay iyang labot sa P6.77 bilyones nga mga transaksiyon, mawad-an na og pagsalig ang mga botante niya. Makonbikto o ma-absuwelto man siya sa husay.
* * *
- Latest
