MANILA, Philippines — Tinuldukan ng Adamson University ang kanilang four-game losing skid matapos ilipad ang 25-20, 25-11, 25-21 panalo kontra sa University of the East sa second round ng UAAP Season 87 women’s volleyball tournament kahapon sa MOA Arena sa Pasay City.
Umarangkada sa opensa si super rookie Shaina Marie Nitura nang irehistro ang 18 points para sa Lady Falcons na napaganda ang karta sa 3-5.
Ayon kay Nitura, natuto na sila sa mga laro sa first round kung saan ay nanalo sila sa mga sets pero hindi nila ito matapos hanggang sa huli.
“We really learned a lot sa mga nangyari sa first round kasi crucial ‘yung games namin. Nananalo kami sa sets, pero hindi binibigay sa amin ‘yung panalo,”’ wika ni Nitura.
Nakatuwang ni Nitura sina Mayang Nuique at Barbie Jamili para dominahin ang Lady Warriors ngayong season na tinalo din nila sa first round 25-20, 25-15, 25-12, noong Pebrero 26.
Tumikada si Nuique ng 11 points, habang siyam ang kinana ni Jamili at nag-ambag si Jen Kylene Villegas ng walong puntos.
Samantala, patuloy na pinuputakte ng kamalasan ang Lady Warriors dahil bokya pa rin sila sa walong salang.
Pumuntos para sa UE si Kc Cepada na may 10 markers.