MANILA, Philippines — Agawan sa huling finals slot ang defending champion National University at Far Eastern University sa kanilang sagupaan sa semifinals ng 2024 Shakey’s Super League (SSL) Collegiate Pre-season Championship ngayong araw sa Rizal Memorial Coliseum.
Inaasahang makapigil hiningang bakbakan ang masisilayan ng mga volleyball fans sa knockout semifinal showdown ng dalawang powerhouse squads sa pag-arangkada ng laro sa alas-6 ng gabi.
Ang mananalo sa Lady Bulldogs at Lady Tamaraws ang makakalaban ng La Salle Lady Spikers sa best-of-three championship series kung saan ang Game 1 ay papalo sa Nobyembre 22.
Maingay ang mga fans sa social media sa muling pagharap ng Lady Bulldogs at Lady Tamaraws, tinalo ng una ang huli sa 2024 National Invitationals title series, umabot ang paluan sa limang sets.
Determinado ang FEU na makabawi, dahil ang NU din ang nagpatalsik sa kanila sa UAAP Season 86 Final Four may anim na buwan na ang nakalipas.
Mainit ang Lady Tamaraws kung saan galing sila sa seven straight victories kasama ang come-from-behind, 21-25, 25-20, 25-17, 25-17, quarterfinal win laban sa College of Saint Benilde noong Linggo.
“Kailangan naming gawin is magtrabaho pa rin and gawin ‘yung mga sinasabi ng mga coaches. Maging consistent pa and magtiwala lang sa mga kasama,” ani FEU veteran winger Chenie Tagaod.
Makakasama ni Tagaod sina Alyzza Devosora, Clarisse Loresco, Gerzel Petallo, Jean Asis at setter Tin Ubaldo para isampa sa finals ang FEU.