UE magpapasolido sa No. 3 spot vs UST
MANILA, Philippines — Bibitbitin nina Precious Momowei, John Abate at Rainer Maga ang University of the East upang kalsuhan ang two-game losing streak kontra sa University of Sto. Tomas ngayong araw sa UAAP Season 87 men’s basketball tournament na lalaruin sa Araneta Coliseum.
Magsisismula ang banatan ng UE at UST sa alas-6:30 ng gabi pagkatapos ng bakbakan sa pagitan ng Ateneo de Manila University at Far Eastern University sa alas-3:30 ng hapon.
Maganda ang inilaro nina Momowei, Abate at Maga sa huli nilang laban pero hindi sapat para akbayan ang UE sa panalo matapos yumuko sa FEU, 51-59 noong Nobyembre 3.
Solo sa No. 3 sa team standings ang UE tangan ang 6-5 karta, nasa pang-apat ang UST na may 5-7, nasa tuktok ang defending champions De La Salle University na hawak ang 11-1 record habang pangalawa ang University of the Philippines pasan ang 9-2 karta.
Maliban sa pagpapalakas ng kapit sa No. 3 spot, pakay din ng Recto-based squad na makabawi sa Growling Tigers na tumalo sa kanila sa first round, 55-70 noong Setyembre 8.
Bagama’t hindi naging maganda ang laro ni Wello Lingolingo, tiyak na kasali siya sa ibabangga ng UE laban sa mga tirador ng España-based team.
Para sa UST, inaasahang itotodo din nila ang kanilang puwersa para makuha ang panalo sa UE at manatiling nasa loob ng magic four.
- Latest
