MANILA, Philippines — Muling masisilayan sa aksyon si veteran playmaker Alohi Robins-Hardy sa Premier Volleyball League (PVL) All-Filipino Conference na papalo sa Nobyembre 9.
Pormal nang inihayag ng Farm Fresh Foxies ang pagkuha nito sa serbisyo ni Robins-Hardy sa kanilang mga social media accounts.
“We’re adding height. We’re adding might. Join us in welcoming, a playmaker we missed playing in the local scene, Alohi Robins-Hardy. Her hiatus is over. And she’s ready to start fresh with the Farm Fresh Nation,” ayon sa post ng Farm Fresh.
Si Robins-Hardy ang ikalawang nadagdag sa lineup ng Foxies matapos kunin si veteran libero Jheck Dionela na galing sa 11-taon na paglalaro sa ilalim ng Cignal HD Spikers.
Nasilayan na sina Robins-Hardy at Dionela sa training camp ng Foxies.
Gayunpaman, posibleng hindi pa makapaglaro si Robins-Hardy matapos lumabas ang ulat na kailangan nitong dumaan sa Rookie Draft.
Isa sa proseso para makapagpartisipa sa rookie draft ang pagsusumite ng mga requirements gaya ng Philippine passport na magpapatunay na may dugo itong Pilipino.
Huling naglaro si Robins-Hardy para sa HD Spikers sa Philippine Superliga (PSL).
Napaulat na hindi nakapaglaro si Robins-Hardy kasama ang HD Spikers sa 2021 PVL Open Conference — ang kauna-unahang kumperensiya ng liga bilang professional league — dahil sa umano’y kabiguan nitong makakuha ng Philippine passport.