MANILA, Philippines — Nagtapos sa ikatlong puwesto si two-time Olympian Ernest John Obiena sa 2024 Wanda Diamond League na ginanap sa Lausanne, Switzerland.
Nagtala si Obiena ng 5.82 metro sa kanyang unang attempt para masiguro ang tansong medalya.
Kasosyo ni Obiena sa third place sina Sondre Guttormsen ng Norway at Kurtis Marschall ng Australia na pareho ring may 5.82m na naitala.
Sinubukan ni Obiena na makuha ang 5.92m subalit bigo ito sa kanyang tatlong pagtatangka dahilan para magkasya lamang ito sa bronze medal.
Nasa ikaanim na puwesto naman si Paris Olympic bronze medalist Emmanouil Karalis ng Greece na may katulad na 5.82m subalit nakuha niya ito sa kanyang ikalawang attempt.
Gaya ng inaasahan, napasakamay ni reigning world champion at two-time Olympic gold medalist Armand Duplantis ng Sweden ang ginto matapos magtala ng 6.15 metro.
Pumangalawa si Paris silver medalist Sam Kendricks ng Amerika na may nairehistrong 5.92m.