MANILA, Philippines — Isinara ng Capital1 Solar Energy ang elimination round ng 2024 Premier Volleyball League (PVL) Reinforced Conference sa pamamagitan ng panalo.
Bumanat si Russian import Marina Tushova ng game-high 35 points mula sa 31 attacks, tatlong service aces at isang block para igiya ang Solar Spikers sa 25-13, 26-28, 25-22, 25-21 paggupo sa sibak nang Galeries Tower Highrisers kahapon sa FilOil EcoOil Centre sa San Juan City.
Inilista ng Capital1 ni coach Roger Gorayeb ang 5-3 record papasok sa crossover quarterfinals at inihulog ang Galeries Tower sa 0-8 marka.
Hihintayin nila ang resulta ng laro ng nagdedepensang Petro Gazz (4-3) at Chery Tiggo (5-2) bukas para sa kanilang final standing sa quarterfinals.
“Sobrang proud po ako sa team namin kasi nagtulung-tulong talaga kami. Iyong locals nag-step up lahat. Sobrang nakaka-proud po,” ani team captain Jorelle Singh na nagtala ng 10 markers para sa Solar Spikers.
Nakatabla ang Highrisers sa second set bago kumulapso sa parehong dulo ng third at fourth frames.
Nagdagdag si middle blocker Des Clemente ng 14 points mula sa 11 attacks at tatlong blocks para sa Capital.