PARIS — Nakakuha ng pag-asa para sa gold medal si Olympic rookie rower Joanie Delgaco matapos bumandera sa repechage 1 papasok sa quarterfinals ng 2024 Paris Games women’s single sculls event.
Sumagwan si Delgaco ng 7:55.00 para banderahan ang mga karibal sa 2,000m race sa Vaires-sur-Marne Nautical Stadium.
Nauna nang nabigo si Delgaco, ang unang Filipina rower na nakalaro sa summer spectacle, na makapasok sa top three sa Heat 2 patungo sa quarterfinals.
Sa nasabing karera ay nagtala si Delgaco ng 7:56.26 para sa fourth place.
Inungusan ni Delgaco sina Vietnamese Thi Hue Pham, Cuban Yariulvis Cobas Garcia, Evidelia Gonzalez Jarquin ng Nicaraguan at Akoko Komlanvi ng Togo.
“Maganda ang start at na-sustain,” wika ni coach Ed Maerina sa ipinakita ng 26-anyos na si Delgaco.
Nakatakda ang quarterfinals sa Martes kung saan inaasahang ibibigay ni Delgaco ang lahat para makaabante sa semifinals at buhayin ang tsansa sa medalya.
Sa 2021 Tokyo Olympics ay pumasok din si Chris Nievarez sa quarterfinals bago tumapos sa ika-23 mula sa kabuuang 31 kalalahok.