Perez kailangan ng suporta ng Cignal teammates

MANILA, Philippines — Kaya ni MJ Perez na umiskor ng 30 points bawat laro para sa Cignal HD sa Pool B ng 2024 Premier Volleyball League (PVL) Reinforced Conference.

Ngnit aminado ang Venezuelan import na kailangan niya ng solidong suporta ng kanyang mga teammates para makarating sa championship round ng torneo.

“I can’t do 30 points alone. I need my teammates, everyone to help me. This is not about me scoring 30, this is about my team helping me,” wika ni Perez na bumida sa 25-18, 29-27, 21-25, 25-22 panalo ng HD Spikers sa ZUS Coffee Thunderbelles noong Martes.

Humataw si Perez ng 30 points mula sa 26 attacks, tatlong aces at isang block habang nag-ambag si Ces Molina ng 16 markers tampok ang 10 hits.

May tig-11 points naman sina Riri Meneses at Jacqueline Acuña.

“It feels great but we have the feeling that we can do more,” sabi ng 32-anyos na si Perez na gumiya sa F2 Logistics Cargo Movers sa pagrereyna sa 2017 Philippine Superliga (PSL) Grand Prix.

Isa sa mga naging teammates ni Perez sa naturang Cargo Movers team ay si libero Dawn Macandili-Catindig na muli niyang kasama sa Cignal.

“It was one of my best memories, not only in the Philippines but also in my entire career because for me, every championship has something special to it,” ani Perez.

Magkasosyo sa liderato ang Cignal at Akari sa Pool B sa parehong 2-0 kartada kasunod ang Capital1 Solar Energy (1-1), Petro Gazz (1-1), Choco Mucho (0-2) at ZUS Coffee (0-2).

Samantala, ipinagpaliban ng PVL ang nakatakdang triple-header sana ngayon dahil sa panana­lasa ng bagyong ‘Carina’.

Sasagupain dapat ng PLDT ang Farm Fresh sa ala-1 ng hapon kasunod ang upakan ng Creamline at Nxled sa alas-3 ng hapon at pagtutuos ng Chery Tiggo at Galeries Tower sa alas-5 ng hapon sa Philsports Arena sa Pasig City.