MANILA, Philippines — Balik-Pilipinas ang titulo ng William Jones Cup matapos pagharian ng Strong Group-Pilipinas ang ika-43 edisyon nito sa bisa ng dikit na 83-79 panalo sa overtime kontra sa host na Chinese Taipei-A kamakalawa ng gabi sa Taiwan.
Hindi naging madali ang misyon ng Strong Group na kinailangan pang burahin ang 64-71 deficit sa huling minuto ng regulation upang maibalik sa bansa ang titulo ng prestihiyosong annual invitational tourney.
Ito na ang ika-7 Jones Cup title ng Pinas at una simula noong 2019 tampok ang Mighty Sports matapos magkasya sa ika-7 puwesto ang Rain or Shine noong nakaraang edisyon.
Si Charles Tiu din ang nagtimon ng Mighty Sports noon bago trangkuhan uli ang Strong Group ngayon sa 8-0 kartada ng torneo.
Tumikada ng 21 puntos, 7 rebounds, 3 assists, 2 steals at 1 tapal si American reinforcement Tajuan Agee para sa kanyang matamis na bawi matapos hindi makalaro sa huling dalawang salang ng Strong Group dahil sa sakit.
Umayuda sa kanya sina Filipino-American standout DJ Fenner at ang PBA rookie RJ Abarrientos na may 15 at 14 puntos, ayon sa pagkakasunod, habang may kumpletong 9 puntos, 4 rebounds, 4 assists at 2 steals si Kiefer Ravena.