MANILA, Philippines — Sisimulan ng Creamline ang pagpuntirya sa ikatlong sunod na korona sa paghataw ng 2024 Premier Volleyball League (PVL) Reinforced Conference ngayon sa Philsports Arena sa Pasig City.
Sasagupain ng Cool Smashers ang PLDT High Speed Hitters ngayong alas-6 ng gabi matapos ang upakan ng Galeries Tower Highrisers at Nxled Chameleons sa alas-2 ng hapon at ang bakbakan ng Chery Tiggo Crossovers at Farm Fresh Foxies sa alas-4 ng hapon.
Ipaparada ng Creamline, nagreyna sa nakaraang dalawang PVL All-Filipino Conference, si American import Erica Staunton kasama sina team captain Alyssa Valdez, Tots Carlos, Michele Gumabao, Bea De Leon, Kyle Negrito at Fil-Canadian rookie Aleiah Torres.
“One of Creamline’s mottos which the coaches made sure to tell me in like the first couple of days, is that there really is no pressure,” ani Staunton.
Wala si Jema Galanza sa eight-time PVL champions na kasalukuyang kasama ng Alas Pilipinas.
Nasa Alas Pilipinas din at hindi maglalaro sa PVL Reinforced Conference sina Eya Laure at Jen Nierva ng Chery Tiggo, Sisi Rondina at Chery Nunag ng Choco Mucho, Vanie Gandler at Dawn Macandili-Catindig ng Cignal, Faith Nisperos at Fifi Sharma ng Akari, Thea Gagate ng Zus Coffee, Julia Coronel ng Galeries Tower at Dell Palomata ng PLDT.
Itatapat ng PLDT sina Russian reinforcement Elena Samoilenko kasama sina Fil-Canadian Savi Davison, Kianna Dy, Kim Fajardo, Mika Reyes, Jules Samonte at Erika Santos.
Sa unang laro ay ipaparada ng Nxled sina Trisha Genesis, Bang Pineda at Roselle Baliton matapos ang swap sa sister team na Akari na nakuha sina Ivy Lacsina, Dani Ravena, Kamille Cal at Camille Victoria.
Ang iba pang imports na maglalaro ay sina Zoi Faki (Choco Mucho), Khat Bell (Chery Tiggo), Wilma Salas (Petro Gazz), Marina Tushova (Capital1), MJ Perez (Cignal), Oly Okaro (Akari), Asaka Tamaru (Zus Coffee), Yeny Murillo (Farm Fresh) at Monique Helena (Galeries Tower).
Hinati ang 12 koponan sa dalawang grupo.
Nasa Pool A ang Cool Smashers, Crossovers, Foxies, Highrisers, Chameleons at High Speed Hitters.
Magkakasama sa Pool B ang nagdedepensang Gazz Angels, Chargers, Solar Spikers, HD Spikers, Flying Titans at Thunderbelles.