Alas ‘di aatras sa Vietnam
MANILA, Philippines — Aminado si Alas Pilipinas coach Jorge Edson Souza de Brito na mahihirapan silang talunin ang Southeast Asia powerhouse Vietnam sa 2024 FIVB Women’s Volleyball Challenger Cup.
Ngunit pinaalalahanan ng Brazilian mentor ang mga Pinay spikers na gawin lamang ang lahat ng kanilang makakaya kontra sa mga Vietnamese.
“We shouldn’t be surprised with what they can do, what we should be concerned about is what we should do,” ani De Brito.
Lalabanan ng Alas Pilipinas ang Vietnam sa Biyernes sa alas-6:30 ng gabi sa knockout quarterfinal match sa Ninoy Aquino Stadium sa Malate, Manila.
Bago ito ay maghaharap sa alas-3 ng hapon ang Czech Republic at Argentina.
Sina veterans Jia De Guzman, Jema Galanza, Sisi Rondina at Fifi Sharma ang muling ibabandera ni De Brito kasama sina collegiate stars Angel Canino, Thea Gagate at Bella Belen.
Nagmula ang mga Pinay spikers sa makasaysayang bronze medal finish sa nakaraang 2024 Asian Volleyball Confederation Challenge Cup for Women noong Hunyo.
Pormal na magsisimula ang VCC bukas ng alas-3 ng hapon kung saan sasagupain ng Puerto Rico ang Kenya kasunod ang pagtutuos ng Belgium at Sweden sa alas-6:30 ng gabi.
- Latest
