MANILA, Philippines — Inaasahang gagamitin ng semifinalist Petro Gazz ang kanilang laro ng Nxled bilang preparasyon sa 2024 PVL All-Filipino Conference Final Four.
Sasagupain ng Gazz Angels ang Chameleons ngayong alas-4 ng hapon kasunod ang salpukan ng Akari Chargers at Strong Group Athletics sa alas-6 ng gabi sa Philsports Arena sa Pasig City.
Sa unang laro sa alas-2 ng hapon ay magtatapat ang Cignal HD Spikers at Capital1 Solar Spikers.
May 8-2 record ang Petro Gazz sa ilalim ng Choco Mucho (9-2) at Chery Tiggo (9-2) kasunod ang nagdedepensang Creamline (8-3).
Ang resulta ng laban ng Gazz Angels at Chameleons (4-6) ang bubuo sa puwestuhan sa single-round robin Final Four.
Sumasakay ang Petro Gazz sa four-game winning streak, kasama ang 25-7, 25-21, 25-17 pagwalis sa Galeries Tower (3-8) noong nakaraang Sabado.
“Iyong mga lapses namin kailangan pang i-adjust kasi papahirap na rin iyong next games and hindi pa rin kami puwedeng basta-basta mag-relax,” ani team captain Remy Palma.
Nagmula rin sa panalo ang Nxled sa 25-13, 25-23, 25-22 paggupo sa Capital1 (1-9).
Target naman ng HD Spikers (6-4) na masundan ang 24-26, 26-24, 25-17, 28-26 pagdaig sa PLDT High Speed Hitters (8-3) kontra sa Solar Spikers.
Ang panalo ng Cignal ang nagpaguho sa tsansa ng PLDT na makapasok sa Final Four.