MILWAUKEE — Humataw si Jaden McDaniels ng 25 points para tulungan ang Minnesota Timberwolves sa 105-93 paggupo sa Phoenix Suns at kunin ang 2-0 lead sa kanilang Western Conference first-round series.
Nagdagdag sina Mike Conley at Rudy Gobert ng tig-18 points para sa Wolves habang nalimitahan si Anthony Edwards sa 15 points matapos bumanat ng 33 markers sa panalo nila sa Game One.
Umiskor si Devin Booker ng 20 points para sa Suns at nag-ambag sina Kevin Durant at sixth man Eric Gordon ng 18 at 15 markers, ayon sa pagkakasunod.
Itinala ng Suns ang eight-point lead sa second quarter patungo sa 51-50 halftime lead kasunod ang ratsada ng Timberwolves para kunin ang 84-76 bentahe na kanilang pinalobo sa 19-point advantage sa fourth quarter.
Sa Los Angeles, kumamada si Luka Doncic ng 32 points at may 23 markers si Kyrie Irving para igiya ang Dallas Mavericks sa 96-93 pagdaig sa Clippers at itabla sa 1-1 ang kanilang first-round playoff series.
Nagkadena sina Paul George at James Harden ng tig-22 points sa panig ng Los Angeles habang humakot si Ivica Zubac ng 13 points at 12 rebounds.
Sa Milwaukee, nagpakawala si Pascal Siakam ng 37 points para pamunuan ang Indiana Pacers sa 125-108 pagresbak sa Bucks at itabla sa 1-1 ang kanilang Eastern Conference first-round playoff series
Kumolekta si Myles Turner ng 22 points para sa Pacers kasunod ang 20 markers ni Andrew Nembhard.