TNT Triple Giga, Vietnamese kampeon sa Asia Tour 3x3
MANILA, Philippines — Hinirang ang TNT Triple Giga at VN Red & Gold ng Vietnam bilang kampeon sa men’s at women’s division ng Asia Tour 3x3 na idinaos sa SM Mall of Asia Music Hall.
Dalawang araw matapos pagharian ng TNT Tropang Giga ang 2023 PBA Governors’ Cup ay nagkampeon naman ang TNT Triple Giga sa two-day event mula sa buzzer-beating putback ni import Raoul Odou sa 19-18 pagtakas sa The Performance Lab Vietnam.
Ang nasabing slam dunk ni Odou ang kumumpleto sa panalo ng TNTna naglaro na wala si injured Samboy de Leon sa huling anim na minuto ng laro.
Diniskaril ng TNT ang hangad na pagwalis ng Vietnam sa torneo makaraan ang 21-16 come-from-behind win ng VN Red & Gold kontra sa Sniper Thailand.
Sa pagkawala ni de Leon ay si Ping Exciminiano ang nagdala sa TNT sa kanyang iniskor na 10 points para hiranging MVP bukod sa kanilang premyong $10,000.
Ibinulsa naman ng VN Red & Gold ang $5,000 sa event na itinaguyod ng SM bilang venue partner, Smart bilang broadcast partner at Wilson bilang official game ball.
Sa pagpasok sa finals ay tinalo ng TNT ang sister team Cavitex, 21-18, sa semifinals sa torneo kung saan kinilala si David Carlos bilang Dunk Contest bitbit ang premyong $500.
- Latest
