MANILA, Philippines — Nagparamdam agad ng lakas si Southeast Asian Games bronze medallist Ian Clark Bautista matapos igupo si Hayato Tsutsumi ng Japan via 3-2 split decision win para umusad sa second round ng men’s featherweight sa 2020 Asian-Oceanian Continental Olympic Qualifying Tournament kahapon sa Prince Hamzah Hall sa Amman, Jordan.
Pumabor kay Bautista ang tatlong judges mula Ukraine (29-28), Colombia (30-27) at Bulgaria (29-28) habang nakuha ng Japanese fighter ang boto ng mga Irish at Moroccan judges na parehong nagbigay ng 29-28 puntos.
“Nagkapaan muna kami sa umpisa ng laban kaya medyo naunahan ako pero nakabawi naman agad ako sa second and third rounds. Magaling din naman siya,” anang 25-anyos na si Bautista.
Subalit inaasahang mapapasabak ng husto sa second round si Bautista dahil titipanin nito si reigning SEA Games champion Chatchai Butdee ng Thailand na nakakuha ng opening-round bye dahil sa kanyang hawak na No. 3 seed.
Si Butdee ang tumalo kay Bautista sa semifinals noong 2019 SEA Games sa Maynila dahilan para magkasya ang Pinoy pug sa tansong medalya.
Kaya naman inaasahang ibubuhos ni Bautista ang lahat upang makabawi sa Thai bet.