MILWAUKEE —Dahil sa kanyang magandang relasyon kay coach Mike Budenholzer ay pinili ni free-agent guard Kyle Korver na maglaro para sa Bucks.
Pumayag ang 38-anyos na si Korver na lagdaan ang one-year, $2.6 million deal, ayon sa kanyang agent na si Jeff Schwartz ng Excel Sports.
Bukod sa Bucks ay ikinunsidera rin ni Korver ang Philadelphia 76ers.
Naglaro ang 38-anyos na three-point shooter ng three-plus seasons para sa Atlanta Hawks ni Budenholzer noong 2015.
Isa si Korver sa mga 'most accurate 3-point shooters' sa kanyang henerasyon matapos magsalpak ng 43 percent sa 16-year NBA career niya at apat na beses pinamunuan ang liga sa 3-point accuracy.
Kakampanya siya para sa Bucks na nakapasok sa Eastern Conference finals at naglista ng best regular-season record na 60-22.
Unang naglaro si Korver para sa 76ers noong 2003 bilang second-round pick bago kumampanya para sa Utah Jazz, Chicago Bulls, Hawks at Cleveland Cavaliers.
Bagama't binitawan si Malcolm Brogdon sa Indiana Pacers ay napalagda naman ng Milwaukee sina guards Wesley Matthews at Korver sa free agency.
Samantala, makikipag-usap naman sa Bucks si free agent guard J.R. Smith, naglaro ng crucial role sa Cavaliers championship run noong 2016 kasama si LeBron James, matapos bitawan ng Cleveland bago mabigyan ng garantiya ang kanyang $15.6 million contract sa susunod na season.
Interesado ang Milwaukee sa 33-anyos na si Smith para idagdag kina Korver at Matthews sa kanilang backcourt sa darating na season.