3-peat sa La Salle?
Laro Ngayon(Smart Araneta)
12nn ADMU vs NU
4pm DLSU vs FEU
MANILA, Philippines — Puntirya ng nagdedepensang De La Salle University na tapusin na ang serye sa pakikipagtipan nito sa Far Eastern University sa Game 2 ng UAAP Season 80 women’s volleyball tournament best-of-three championship series ngayong hapon sa Smart Araneta Coliseum.
Magkukrus ang landas ng Lady Spikers at Lady Tams sa alas-4 ng hapon.
Nakalapit sa inaasam na three-peat ang La Salle matapos ilampaso ang FEU sa series opener noong Sabado, 29-27, 25-21, 25-22.
Ngunit hindi pa tapos ang laban.
At alam ni Lady Spikers head coach Ramil De Jesus na gagawin ng Lady Tamaraws ang lahat upang maipuwersa ang rubber match.
“Pipilitin namin na makuha yung Game 2 dahil mahirap na kapag umabot pa sa Game 3. Lamang ang FEU sa attacks nung Game 1. Pinag-aralan namin ang performance nila at kung paano sila mako-control,” ani De Jesus.
Aasahan ng La Salle ang beteranong sina Kim Kianna Dy, Majoy Baron, Tin Tiamzon at Desiree Cheng sa attack line.
Kailangan din nina libero Dawn Macandili at setter Michelle Cobb ng magandang koneksiyon para makabuo ng solidong plays para sa mga La Salle spikers.
Sa men’s division, target ng National University na hubaran ng korona ang Ateneo sa Game 2 ng kanilang sariling best-of-three finals series.
Sinakmal ng Bulldogs ang matikas na 25-20, 25-19, 25-23 panalo sa Game 1 kontra sa Blue Eagles.
- Latest
