CEBU, Philippines - Lisud na tupngan ang legasiya nga nahimo sa San Miguel Beermen sa PBA ug misamot pa kini human sa laing kasaysayan nga ilang gikulit isip usa sa mga koponan nga mihimo og three-peat championship sa All-Filipino Cup.
Kini human nila gilangkat ang 2017 PBA Philippine Cup trophy niadtong Domingo dihang ilang gipukan ang Barangay Ginebra San Miguel sa Game-5 sa iskor nga 91-85. Si PBA MVP June Mar Fajardo ug is Arwind Santos maoy nangulo sa Beermen sa ilang 21 puntos, samtang si Alex Cabagnot mitampo og 18 puntos ug ang Finals MVP nga si Chris Ross adunay 12 puntos, 10 ka assists ug walo ka rebounds.
Ang San Miguel mao ang ikaduhang PBA franchise sunod sa Talk N' Text Tropang Texters nga midawat sa Jun Bernardino Perpetual Trophy nga gihatag sa mga koponan nga makaangkon sa All-Filipino title sa tulo ka sunod-sunod nga season.