Laro Ngayon
(The Arena, San Juan City)
12:45 p.m. PLDT vs UP
3 p.m. Coast Guard
vs Kia Forte
5 p.m Navy vs Army
MANILA, Philippines – Palalakasin ng UP Lady Maroons at Army Lady Troopers ang paghahabol ng puwesto sa susunod na round sa pagharap sa magkahiwalay na laro sa Shakey’s V-League Season12 Reinforced Conference ngayon sa The Arena sa San Juan City.
Inaasahang masusukat ang kalidad ng Lady Maroons dahil katunggali nila ang PLDT Home Ultera Fast Lady Hitters sa alas-12:45 ng hapon.
May 2-0 karta ang UP nang magwagi sila sa Navy Lady Sailors at Coast Guard Lady Dolphins at kailangang maipagpatuloy ang magandang paglalaro nina Nicola Tiamzon, Kathy Bersola, Isabel Molde at Justine Dorog para makasabay sa tiyak na maalab na paglalaro ng PLDT na galing sa pagkatalo sa Army sa huling laro.
Hindi pa tiyak kung maglalaro na uli sa koponan si Alyssa Valdez pero asahan na itataas uli ng mga beteranang sina Sue Roces, Aiza Pontillas at Gretchel Soltones ang kanilang mga laro para agad na makabangon matapos ang kabiguan.
Ang Army ay kalaban ang Navy sa huling laro sa triple-header dakong alas-5 ng hapon at nais din ang ikatlong dikit na panalo na maglalapit sa koponan sa hangad na upuan sa semifinals sa ligang inorganisa ng Sports Vision katuwang ang Shakey’s at handog ng PLDT Home Ultera.
Isa naman sa Coast Guard at Kia Forte ang papasok sa win column sa kanilang pagkikta sa ikalawang laro sa alas-3.