CLEVELAND – Hindi naglaro si LeBron James sa huling preseason game ng Cavaliers laban sa Dallas Mavericks.
Ngunit sinabi ni Cavaliers coach David Blatt na magiging handa ang four-time MVP sa pagbubukas ng NBA regular season sa susunod na linggo.
Sapul noong Oktubre 12 ay hindi na nakita sa aksyon si James, tinurukan ng anti-inflammatory sa kanyang likod noong nakaraang linggo.
Lalabanan ng Cavs ang Bulls sa Chicago sa Oct. 27.
“He will absolutely be ready for the season opener,” paniniyak ni Blatt kay James.
Hindi nakita si James sa 13 laro sa nakaraang season bunga ng kanyang back at knee issues.
Maglalaro ang 30-anyos na si James sa kanyang ika-13 season at naigiya ang Miami Heat at Cavaliers sa limang sunod na NBA Finals.
Nagtala ang Cleveland ng 0-6 record sa preseason dahil sa fractured left kneecap ni Kyrie Irving na nangyari sa Game 1 ng nakaraang NBA Finals at hindi pa alam kung kailan siya maglalaro.
Kasama naman ang nagbabalik na si Kevin Love, nagkaroon ng dislocated left shoulder sa opening round ng nakaraang playoffs, sa lineup ng Cavaliers kontra sa Mavericks.