Puwestuhan na lang sa Cardinals, Heavy Bombers

Laro Ngayon

(Mall of Asia Arena, Pasay City)

2 p.m.  La Salle-Greenhills vs Arellano (step ladder semis jrs.)

4 p.m.  Jose Rizal U vs Mapua (playoff srs.)

MANILA, Philippines –  Higit sa puwesto, ang magkaroon ng momentum papasok sa mahirap na Final Four sa 91st NCAA men’s basketball ang hanap ng host Mapua Cardinals  at Jose Rizal University Heavy Bom­bers sa kanilang pagtutuos ngayon sa Mall of Asia Arena sa Pasay City.

Sa ganap na alas-4 ng hapon gagawin ang ta­gisan at ang mananalo ang siyang ookupa sa ikatlong puwesto sa semifinals na lalarga sa susunod na linggo.

Nangailangan ng playoff sa seniors dahil pa­re­hong may 12-6 marka ang Cardinals at Heavy Bombers sa pagtatapos ng double-round elimination.

Ang Arellano Chiefs ay tumapos din sa 12-6 karta pero sinibak sila ng Cardinals,  93-75, noong Martes.

Wala namang makukuhang malaking bentahe ang mananalo sa larong ito dahil ang  lalabas na number three ay makakaharap ang pumapangalawang Letran Knights habang ang matatalo ang kasukatan ng 5-time defending champion at top seed San Beda Red Lions.

Sisimulan naman ang step-ladder semifinals sa juniors division sa pagtatapat ng La Salle-Greenhills at Arellano sa ganap na alas-2 ng hapon.

Ang mananalo rito ang katunggali ng number two seed Mapua na may twice-to-beat advantage sa labanan.