MANILA, Philippines – Tinapatan ni Bernabe Teodoro ang kanyang career-high na 32 puntos para ibigay sa Jose Rizal University Heavy Bombers ang ika-limang sunod na panalo kontra sa Lyceum Pirates, 64-55, sa 91st NCAA men’s basketball kagabi sa The Arena sa San Juan City.
Anim na 3-pointers ang kinamada ni Teodoro pero ang kanyang mahahalagang puntos ay ang transition lay-up at dalawang free throws para palamigin ang pagdikit ng Pirates sa 60-55.
Ito na ang ika-11 panalo sa 17 laro para makasalo sa ikatlong puwesto ang Perpetual Help Altas na nadisgrasya ng San Sebastian Stags, 91-87.
Kailangan ng Heavy Bombers na manalo sa Stags sa Martes para makahirit ng playoff sa semifinals.
Pinakamabangis si Teodoro sa ikatlong yugto nang araruhin ang 12 puntos mula sa apat na tres.
Ang pangalawang triple sa yugto ang nagpatikim sa Heavy Bombers ng pinakamalaking kalamangan sa laro na 13 puntos, 42-29.
Nagsikap ang Pirates na bumangon ngunit kumulapso sa huli.