Narvasa guest speaker sa PBAPC Awards Night

MANILA, Philippines – Ang bagong PBA Commissioner na si Chito Nar­vasa ang magsisilbing guest speaker ng PBA Press Corps (PBAPC) para sa kanilang Annual Awards Night bukas sa Century Park Hotel.

Ang pang-siyam na PBA Commissioner, iniluklok si Narvasa para sa puwestong binakante ni Chito Salud mula sa unanimous vote ng board of governors.

Nagsilbing coach ng Shell at Purefoods, si Nar­vasa ay naging presidente rin ng Basketball Coaches Association of the Philippines (BCAP).

Siya ay anak ng yumaong si dating Chief Justice Andres Narvasa.

Ang formal affair na inihahandog ng SCBC-8 Entertainment Corporation at ng Accel ay magsisimula sa ganap na alas-7 ng gabi.

Sasamahan ng PBA Commissioner ang PBAPC sa pagpaparangal sa mga top achievers ng nakaraang season na tinatampukan ng pagbibigay sa Baby Dalupan” Coach of the Year kay San Miguel Beer mentor Leo Austria.

Iginiya ni Austria ang Beermen sa korona ng Philippine Cup at ng Go­vernors’ Cup.

Tatanggapin naman ni 40th season chairman Pato Gregorio ang “Danny Floro” Executive of the Year award.

Ang iba pang gagawaran ng pagkilala ay sina June Mar Fajardo (Gerry’s Grill-Defensive Player of the Year), Calvin Abueva (Mr. Quality Minutes), Alex Cabagnot (Comeback Player), Paul Lee (Order of Merit), Terrence Romeo (Scoring Champion) at ang All-Rookie Team nina Stanley Pringle, Chris Banchero, Jericho Cruz, Matt Ganuelas-Rosser at Jake Pascual.