CEU, St. Clare muling nagpasiklab sa NAASCU cagefest
MANILA, Philippines - Tumapos ng 26 puntos at 22 rebounds si Rodrique Ebondo habang dalawang iba pa ang naghatid ng magandang numero para ibigay sa nagdedepensang kampeon na Centro Escolar University ang 83-74 overtime panalo sa Philippine Christian University sa NAASCU men’s basketball kahapon sa Makati Coliseum.
Naghatid pa ng 17 puntos si John Karlo Casino habang may 15 puntos si Joseph Manlangit para sa CEU na na-outscore ang PCU, 14-5, sa extention.
Ginapi ng St. Clare College ang City University of Pasay, 66-52, habang nanalo rin ang Our Lady of Fatima University sa New Era University, 104-60 sa iba pang mga laro.
Si Darwin John Lunor ay mayroong 18 puntos habang double-double na 16 puntos at 12 rebounds ang ibinigay ni Onokeruraye Aguarra para sa Saints na nagsimulang lumayo sa kalagitnaan ng ikalawang yugto.
Tig-13 puntos ang ginawa nina Grevanni Rublico, Joseph Marquez, Jerome Juanico at Benjie Jimenez para sa Our Lady of Fatima na agad na umarangkada sa 24-2 sa unang yugto upang angkinin ang buwenamanong panalo.
- Latest
