Quarterfinals ikakamada vs Lady Chiefs, Lady Bulldogs ‘di bibitaw

STANDINGS W   L

Group A

NU                    2    0

FEU                  2    0

Arellano                       1    1

UP                                1    1

UB                                0    2

PUP                  0    2

Groupo B

St. Benilde                  2    0

Ateneo                         2    0

UST                  1    1

TIP                    1    1

DLSU-Dasma             0    2

San Sebastian           0    2

Laro Ngayon

(The Arena, San Juan City)

12:45 p.m.  Arellano vs NU

3 p.m.  FEU vs PUP

5 p.m.  San Sebastian

vs TIP

MANILA, Philippines - Aasa ang National University Lady Bulldogs sa mga pamalit para manati­ling nasa liderato sa Sha­key’s V-League Season 12 Collegiate Conference ngayon sa The Arena sa San Juan City.

Nanaig sa mga kopo­nan ng UP Lady Maroons at University of Batangas Mighty Brahmans, mapapalaban ang Lady Bulldogs laban sa Arellano Lady Chiefs dahil hindi nila makakasama ang dalawang pambatong manla­laro sa larong magsisimula  sa ganap na alas-12:45 ng tanghali.

Sina Dindin Manabat at Myla Pablo ay wala sa larong ito dahil kasama sila sa ipinadalang koponan sa VTV Cup sa Vietnam.

Si Pablo at Manabat ang pangalawa at pa­ngat­long best scorers ng NU matapos ang 31 at 28 kabuuang puntos sa da­la­wang laro.

Si Jaja Santiago na siyang leading scorer sa liga bitbit ang 38 puntos sa 24 kills, 6 blocks at 8 aces, ang siyang mangunguna sa koponan ngunit dapat na mayroon siyang katuwang para hindi mapurnada ang pakay na 3-0 karta sa Group A na sapat na upang makapuwesto na sa quarterfinals sa ligang inorganisa ng Sports Vision katuwang ang Shakey’s at handog ng PLDT Home Ultera.

Ang Lady Chiefs ay ga­ling sa four-sets pagkatalo sa FEU Lady Tamaraws at hindi sila papayag na mabigo uli upang hindi madiskaril ang planong makaabante sa susunod na yugto.

Ang Lady Tamaraws na may 2-0 rin sa Group A, ay balak na maisulong  pa ang winning streak kontra sa PUP Lady Radicals sa ganap na alas-3 ng hapon habang balak ng TIP Lady Engineers ang makaba­ngon matapos matalo sa huling laro kontra sa San Sebastian Lady Stags dakong alas-5 ng hapon.

Matapos malusutan ang La Salle-Dasma Lady Patriots sa limang sets ay natalo ang TIP sa St. Benilde Lady Blazers sa apat na sets para makasalo ang UST Tigresses sa 1-1 karta.

Tiyak] na dadaan uli sa butas ng karayom ang TIP dahil nais ng Lady Stags na tapusin ang dalawang sunod na pagkatalo upang manatiling buhay ang paghahabol ng upuan sa quarterfinals.