Orton ‘di natinag sa pahayag vs Pacman
MANILA, Philippines - Hanggang ngayon ay naninindigan pa rin si dating Purefoods import Daniel Orton kaugnay sa kanyang ipinahayag laban kay Manny Pacquiao, ang playing coach ng Kia sa Philippine Basketball Association.
Sa isang panayam ay sinabi ni Orton na wala siyang nakikitang masama ukol sa kanyang pagbatikos sa paglalaro ni Pacquiao sa PBA.
“I feel like I wasn’t wrong in what I said,” wika ni Orton. “I know I upset the whole country but I wasn’t wrong in what I said.”
Matapos ang pagkatalo ng Hotshots sa Carnival noong Pebrero ay tinawag ni Orton si Pacquiao na isang ‘joke’ kasabay ng pagkondena sa officiating sa PBA.
Ang resulta nito ay ang multang P250,000 ng PBA Commissioner’s Office kasabay ang pagsibak sa kanya ng Purefoods bilang import.
Sinabi ni Orton na ang paglalaro ni Pacquiao sa PBA ay pambabastos sa mga players na nagtiyaga mula sa high school hanggang amateur ranks para lamang makapasok sa PBA.
“My message was to not disrespect the game I know and love. I feel like that’s what it was. Disrespect more than anything,” ani Orton.
Kinuha si Orton ng Grand Rapids Drive ng NBA Developmental League bilang pinakabago nilang player.
Ang naturang koponan ay tinatangkilik ni Floyd Mayweather Jr. na tubong Grand Rapids.
Ang 6-foot-9 na si Orton, produkto ng Kentucky at ang first round draft pick ng Orlando Magic, ang magiging starting center para sa Grand Rapids Drive.
- Latest
