Generals, Blazers lumapit sa finals ng NCAA men’s volleyball tourney

MANILA, Philippines - Hindi nawalan ng loob ang Generals sa kabila ng kabiguan sa first set.

Bumangon ang Emilio Aguinaldo College mula sa first set loss para talunin ang Arellano University, 24-26, 25-19, 25-21, 25-17, at palakasin ang kanilang pag-asa sa ikalawang championship appearance sa 90th NCAA men’s vol­ley­ball tournament sa The Arena sa San Juan City.

Nagpasabog si Howard Mojica ng match-high na 24 hits, ang 21 ay mula sa kills, para sa unang panalo ng Generals sa semifinal round at makalapit sa una nilang best-of-three finals stint.

Nakapasok ang EAC sa finals noong nakaraang taon ngunit pinayukod sila ng Perpetual Help para sa pang-apat na sunod na ti­tulo ng Altas.

Ngayong season ay hin­di pa natatalo ang Ge­nerals ng isang laro sa ka­nilang 10 asignatura, ka­sama dito ang nine-game sweep sa elimination round.

Pinalakas din ng College of St. Benilde ang ka­nilang tsansa sa finals nang gulatin ang Perpetual Help, pinupuntirya ang kanilang pang-limang sunod na kam­peonato, mula sa 25-12, 29-27, 19-25, 25-20 ta­gumpay.

Humataw si Johnvic de Guzman ng 33 hits para sa pagpapatumba ng Blazers sa Altas.