Triple-header sa D-League kinansela dahil kay ‘Ruby’
MANILA, Philippines - Kinansela ni PBA Commissioner Chito Salud ang triple-header game sa PBA D-League Aspirants’ Cup kahapon sa Ynares Sports Arena sa Pasig City.
Magtutuos dapat ang Bread Story-LPU Pirates at Cebuana Lhuillier Gems sa ganap na ika-12 ng tanghali bago sundan ng pagkikita ng Hapee Fresh Fighters at Café France Bakers sa alas-2 at Cagayan Valley Rising Sun at Racal Motors Alibaba sa alas-4 ng hapon sa Ynares Sports Arena sa Pasig City.
Inaasahang parating kahapon ang bagyong ‘Ruby’ at dala ang malalakas na pag-ulan at hangin upang malagay sa peligro ng mga manlalaro, opisyales at mga manonood ng liga para magdesisyon si Salud na ipagpaliban ito.
Ang bagong iskedul sa tatlong nabanggit na laro ay ipapaalam ng liga sa mga susunod na araw.
Ang D-League ang ikatlong sports event na naapektuhan dahil sa bagyo.
Naunang kinansela ng PBA ang laro sa Dipolog City noong Sabado sa pagitan ng Purefoods at Barako Bull habang noong Linggo ay nagdesisyon ang organizers ng National Milo Marathon na huwag ituloy ang karera sa Mall of Asia Grounds sa Pasay City.
Magbabalik ang aksyon sa Huwebes sa Ynares Sports Arena at ang unang laro ay sa panig ng MP Hotel Warriors at Tanduay Light Rhum Masters sa ganap na alas-10 ng umaga bago halinhinan ng Hapee Fresh Fighters at Wangs Basketball sa alas-12 ng tanghali at MJM M-Builders at Café France Bakers sa alas-2 ng hapon.
- Latest
