MANILA, Philippines – Nagtulong sina Neil Barry Ytorzaita at Bonjomar Castel sa 24 puntos para pangunahan ang five-time defending champion Perpetual Help Altas sa kanilang ika-52 sunod na panalo sa pamamagitan ng 27-25, 25-14, 27-25, panalo sa Lyceum Pirates sa 90th NCAA men’s volleyball kahapon sa The Arena sa San Juan City.
Napalaban ang Altas sa una at ikatlong set pero lumabas ang kanilang karanasan para mapanatili ang kanilang winning streak na nagsimula noon pang 2010.
Ito ng ikalimang sunod na tagumpay ng Altas sa season bagay na napantayan ng Emilio Aguinaldo College Generals nang hiritan ang Arellano Chiefs ng 25-17, 25-21, 25-22, panalo sa ikalawang men’s division.
Sa women’s play, nakabawi ang nagdedepensang kampeon sa kababaihan na Lady Altas ng kumana ng 25-18, 25-21, 25-21, panalo sa Lyceum Lady Pirates para sa 4-1 karta.
Nanalo rin ang Arellano Lady Chiefs sa EAC Lady Generals, 25-13, 25-15, 25-20 at manatiling nasa itaas.