HANOI – Ikalawang sunod na panalo na magsisilbing tiket para sa crossover semifinals ang hanap ng Philippine Azkals sa inspiradong Indonesian team sa pagpapatuloy ngayon ng 2014 AFF Suzuki Cup sa My Dinh Stadium dito.
Ang laro ay magsisimula sa alas-4 ng hapon (5 p.m. sa Pinas) at mapapanood ito ng live sa ABS-CBN Sports and Action.
Galing ang Azkals sa impresibong 4-1 panalo sa Laos sa pagbubukas ng kompetisyon at kung masundan pa ito ng tagumpay sa Indonesia ay magkakaroon ang Pambansang koponan ng anim na puntos para umabante na sa semifinals sa ikatlong sunod na edisyon.
Hindi magiging madali ang larong ito lalo pa’t ang Indons team ay bumangon mula sa 0-2 iskor at naitabla ang laro kontra sa host Vietnam sa 2-2.
Ang Indonesia rin ang nakaharap ng Pilipinas sa semifinals noong 2010 edisyon at winalis ng una ang dalawang laro para mapatalsik ang Pambansang koponan.