MANILA, Philippines - Walang patawad ang larong ipinakita ng nagdedepensang kampeon La Salle Lady Archers nang durugin ang UP Lady Maroons, 66-31, sa 77th UAAP women’s basketball kahapon sa Blue Eagle Gym.
May 11 puntos, pitong rebounds at apat na assists si Alyanna Ong habang may 10 puntos si Steph Vergara para sa Lady Archers na nanalo sa ikatlong sunod na laro.
Nasolo ng La Salle ang liderato nang tinalo ng UST Tigresses ang Ateneo Lady Eagles, 55-54, sa isa pang laro.
Tumayong bida para sa UST si Mariella Isanan na nakaiskor ng lay-up sa huling 15.7 segundo bago pinagmasdan na naisablay ni Sara Bo-ot ang kanyang drive.
May 14 puntos si Jen Angeles habang 10 puntos at 14 rebounds ang ginawa ni Maica Cortes.
Si Claire Aseron at Hazelle Yam ay may 13 at 11 puntos para sa Ateneo na naramdaman ang limitadong paglalaro ni Danica Jose bunga ng fouls.