Mga miyembro ng FIBA-Asia U-18 3x3 champion team magkakahiwalay

MANILA, Philippines - Maghihiwalay ng landas ang dalawang magka­kampi sa FIBA-Asia U-18 3x3 champion squad sa ka­nilang paglalaro sa UAAP men’s basketball tour­nament sa susunod na season.

Naging magkakampi si­na Arvin Tolentino at Prince Rivero sa national team kasama sina Thirdy Ra­vena at Kobe Paras na su­mabak sa FIBA-Asia U-18 3x3 championships sa Bangkok noong nakaraang taon.

Natalo ang mga high school stars sa Qatar, 17-14, bago kumamada ng anim na sunod na panalo, ka­bilang ang tagum­pay laban sa China, 22-18, sa se­­mifinals at kontra sa India, 21-19, sa finals para angkinin ang korona.

Ngayon ay maghihiwalay na sila.

Magtutungo si Tolentino sa Ateneo mula sa San Be­da, habang iiwanan naman ni Rivero ang La Salle- Greenhills para maglaro sa De La Salle University.  

Magkikita namang muli sina Ra­vena at Tolentino sa Ateneo.  

Si Paras, may isang ta­on pa sa kanyang UAAP ju­nior eligibility, ay inalok ng athletic scholarship sa Cathedral High School sa Los Angeles.

Kung babalik sa bansa si Paras ay gusto ng kanyang amang si Benjie na mag­laro siya para sa Green Archers sa UAAP se­niors.

Pinamunuan ng 6-foot-5 na si Tolentino ang San Be­da Red Cubs sa NCAA junior championships at nakalaban ng 6’4 na si Rivero.

Nabigo si Rivero, ang ama ay ang  strength and con­­ditioning coach ng Ba­­rako Bull sa PBA, na aka­­yin ang Greenies sa kampeo­nato ng NCAA juniors.