MM National Finals tatakbo na

MANILA, Philippines - Libu-libong mananakbo ang nasa Mall of Asia sa Pasay City bago pa man sumilip ang haring araw para makiisa sa 37th Milo Marathon National Finals.

Tinatayang papalo sa 35,000 runners ang kakarera sa limang kategoryang paglalabanan para tumibay din ang hangaring malagpasan ang 230,000 runners na sumali sa 18 yugtong karera, kasama ang 17 regional eliminations.

Tampok na karera ay ang 42.195-km full marathon na kung saan hahanapin ang magiging kampeon sa Open at Local categories sa kalalakihan at kababaihan.

Gagantimpalaan ang mananalo sa Open, kasama ang mga foreign runners, ng P300,000.00 habang ang pinakamabilis sa locals ay may pabuyang P150,000.00.

Si James Tallam ng Kenya ang magbabalak na palawigin sa ikatlong sunod na taon ang pagdodomina sa Open division pero mapapalaban siya kay 4-time champion Eduardo Buenavista, ang nagdedepensang kampeon sa locals.