PNP, PhilHealth sosyo sa unahan

 Laro sa Linggo

(Ynares Sports Arena, Pasig City)

2:30 p.m. PNP vs PhilHealth

4:00 p.m. Congress-LGU vs MMDA

5:30 p.m. Judiciary vs AFP

MANILA, Philippines - Kinuha ng PhilHealth at Philippine National Police ang ikalawang sunod na pa­nalo nang padapain ang mga dating wala ring talong koponan sa pagpapatuloy ng 1st UNTV Cup noong Linggo sa Ynares Sports Arena sa Pasig City.

Gumawa sina Carlo Timothy Capati at Kenneth Emata ng 24 at 20 puntos para sa balanseng pag-atake ng PhilHealth tungo sa 98-73 dominasyon sa Congress-LGU.

Nagpasabog si Ervic Vijandre ng 35 puntos sa second half pero hindi na kinaya pa ng tropang hawak ni playing coach Gerry Esplana na makabangon pa mula sa 27-puntos na pagkakalubog sa first half para bumaba sa 1-1 baraha.

Si dating UAAP standout Olan Omiping ay may­­ 23 puntos para sa PNP na naglatag ng ma­tibay na depensa sa endgame tungo sa 72-69 panalo sa Armed Forces of the Philippines (AFP).

Nasayang ang 12 puntos at 12 rebounds bukod pa sa 4 steals at 2 blocks si Roland Pascual dahil nakasalo ngayon ang AFP sa ikalawang puwesto sa 1-1 karta.

Nakapasok na rin sa win-column ang Judiciary nang durugin ang Department of Justice (DOJ), 130-60, sa ikatlong laro.

Mahalaga ang bawat panalong makukuha dahil single-round robin ang magaganap sa pitong ko­ponan at ang mangu­ngulelat sa ligang inorganisa ng Breakthrough and Milkestones Production International (BMPI) sa pamumuno ni Chairman at CEO Daniel Razon, ay mamamaalam agad.