World championship qualifier Asian Zonals: Phl Spikers-Vietnam magpapaluan na

MANILA, Philippines - Respetadong panimula ang hanap ngayon ng Phi­lippine women’s volleyball team sa pagharap sa ma­lakas na Vietnam sa pagbubukas ng FIVB 2013 World Championship Qua­lifier Southeastern Zone sa Quiang Tri,Vietnam.

Tampok na laro ito na magsisimula sa ganap na alas-8 ng gabi at alam ni head coach Roger Go­rayeb na mahirap na laban agad ito para sa koponang nagsanay lamang sa loob ng pitong araw.

“Modest lang ang expectations,” wika ng multi-titled coach na si Gorayeb na makakatulong na dumiskarte sa koponan sina National University mentor Edjet Mabbayad at Ariel dela Cruz.

Tatlong laro ang haharapin ng koponan at bukas ay katunggali nila ang Myanmar at sa Linggo ay makakatipan ang Indonesia. Ang dalawang larong ito ay sisimulan sa ganap na alas-5 ng hapon.

Ang mangunguna ma­tapos ang tatlong araw na torneo ay aabante sa Asian Zonals pero para sa koponan, ang makapagtala ng panalo ay isa ng mala­king bagay lalo pa’t ito ang kauna-unahang women’s national team na nabuo matapos ang 2005 Philippine SEA Games.

Ang mga aasahan ay sina Dindin at Jaja Santiago, Rubie de Leon, Alyssa Valdez, Jennylyn Reyes, Myla Pablo at Suzanne Roces.

Kukumpletuhin ang ko­ponan nina Iari Yongco, Pau Soriano, Maika Ortiz, Jhech Dionela at Rhea Dimaculangan.

Ipinadala ng Philippine Olympic Committee (POC) at suportado ng Philippine Sports Commission (PSC), Smart Communication at Accel, ang koponan ay umalis noong Miyerkules at nagkaroon ng isang araw na pahinga para maikondis­yon agad ang sarili sa mabigat na unang laban.

Ang POC ang pagpadala ng koponan sa palarong may basbas ng Asian Volleyball Confe­deration nang hindi kumilos ang Philippine Volleyball Federation sa imbitasyon  AVC at host Vietnam na sumali ito.