La Salle asam ang titulo sa UAAP netfest

Laro Ngayon

(Rizal Memorial

Tennis Center)

9 a.m. UST vs La Salle

MANILA, Philippines - Aasintahin ngayon ng La Salle ang kampeo­nato sa women’s tennis sa pagharap uli sa UST ngayong umaga sa Rizal Memorial Tennis Center.

Umabante sa 1-0 kalamangan ang Lady Archers sa Lady Tigresses nang angkinin ang 3-2 panalo sa pagbubukas ng best-of-three championship series noong Martes.

Si Marinel Rudas ang siyang nagbigay ng panalo sa La Salle nang sibakin si Lenelyn Milo, 6-1, 6-0, sa huling laro.

“Sana hindi magbago ang ipinakita nilang laro,” wika ni La Salle coach Roland Kraut.

Bukod kay Rudas, aasa rin ang  Lady  Archers sa hu­say nina Reggie Santiago at Martina Guba na siyang naghatid ng dalawang panalo.

Mangunguna sa kopo­nan si Macy Gonzales na ginulat ni Santiago sa Game One, 2-6, 2-6.

Kung manalo ang Archers maibubulsa nila ang ikaanim na titulo bukod pa sa pagpapakinang sa mabungang kampanya ng koponan sa 75th season.