MANILA, Philippines - Masusukat ngayon ni NLEX Road Warriors coach Boyet Fernandez ang pinalakas niyang line-up sa pagharap sa inspiradong Cagayan Rising Suns sa PBA D-League Aspirants’ Cup ngayon sa JCSGO sa Cubao, Quezon City.
Sa unang pagkakataon ay magagamit ng Road Warriors si 7-footer Greg Slaughter upang makatulong sa asam na ikapitong sunod na panalo at ika-24 sunod sa pangkalahatan.
Ang tagisan ay itinakda sa alas-2 ng hapon matapos ang unang laro sa pagitan ng Informatics at Blackwater Sports sa alas-12 ng tanghali.
Hanap ng Elite ang ikaapat na panalo sa limang laro.
Si Slaughter, tinulungan ang Ateneo na makamit ang ika-limang titulo sa UAAP, ay makakalaro na dahil nakuha na ang dokumento na hinihingi ng liga mula sa Bureau of Immigration and Deportation.
“Malakas ang Cagayan sa rebounding kaya’t ito ang maitutulong ni Greg sa amin,” wika ni coach Boyet Fernandez.
Pero hindi naman dapat na iasa lamang kay Slaughter ang laban kundi dapat ay manatili ang tikas ng ibang manlalaro.