MANILA, Philippines - Limang kabayo ang maglalaban-laban sa pagbabalik ng Philippine Sportswriters’ Association (PSA) Cup bilang bahagi ng Philippine Charity Sweepstakes Office 78th Anniversary sa Linggo sa San Lazaro Leisure Park sa Carmona, Cavite.
Ang mga kasali ay ang Purple Ribbon (V Dilema), Arvin Dugo (JB Bacaycay), Hi Money (Pat Dilema), Pleasantly Perfect (JB Hernandez) at Si Senor (JT Zarate).
Sa 1,600-metro ang distansya ng karera at walang itulak-kabigin sa mga kalahok dahil halos magkakasukat ang kanilang angking husay at lakas kaya’t sa diskarte ng nakasakay na hinete inaasahang magkakatalo ang mga kalahok.
Sina PSA President Rey Bancod ng Tempo ang inaasahang dadalo sa awarding ceremony kasama si PCSO General Manager at dating Philippine Racing Commission (Philracom) chairman Atty. Jose Ferdinand M. Rojas II.
Ang PSA Cup na napahinga sa loob ng dalawang taon, ay isa sa dalawang tampok na karera sa pagtatapos ng pista sa nasabing race track.
Itatakbo rin ang PCSO Anniversary Race na sasalihan ng anim na kabayo na Machine Gun Mama (P Dilema), Seni Seriyorum (Red de Leon), Quaker’s Hill (JA Guce), Pinay Beauty (MA Alvarez), Madam Theresa (JT Zarate) at Pugad Lawin (JB Guce).
Ang mga kikitain sa PSA Cup ay igugugol sa ibang programa ng pinakamatandang asosasyon sa sportswriting habang ang pondong malilikom sa PCSO Race ay ilalaan para sa Pugad Lawin Philippines na isang organisasyon na nagsasagawa ng medical at dental missions at nagbibigay ng scholarships sa mga mag-aaral na nasa pampublikong paaralan.