Naghinam-hinam sa bugno sa kama

Dear Tito Miguel,

Ako diay si Gabriela, 23 anyos, taga Cogon Pardo, Cebu City. Nagtrabaho isip call center agent. Akong problema karon kay ang akong uyab nga si Marcelo kay sigeg hangyo nga motilaw sa akong babaye. Walo ka buwan na ang among relasyon. Wala gyud ko nisugot sa iyang hangyo, kay kutob ra gyud sa kiss ang limitasyon, ug dili puwede nga molabaw pa ana. Morespeto hinoun si Marcelo sa akong hukom. Pero usahay maka-feel ko og kalouy niya, kay ma-feel gyud nako nga ganahan na siya nga motilaw nako ilabi na kun mobakasyon mi sa laing lugar. Kontrolon nalang intawn niya ang iyang kaugalingon kay mahadlok siya nga malain ko niya kun ipamugos niya ang iyang gusto. Mahadlok bitaw ko momabdos, maong dili gyud ko magpahilabot. Sa tan-aw nimo, dili ra ba kaha mahupas ang gugma niya dinhi kanako? Basin laayan siya sa among relasyon ba,ug makahuna-huna nga buwagan ko niya. Sa tinoud lang, magpahilabot lang ko sa akong pagkababaye kun duna nami igong tinigom, ug makasuporta kun pananglitan makabaton mi og anak.  -Gabriela-

Gabriela,

Kun mohupas iyang gugma tungod kay mobalibad ka makighilawas, buot pasabot lawas ra nimo iyang giapas. Dili ka niya hinigugma, gipagnasaan lang ka. Kun gihigugma gyud ka niya, lagmit pa motaas iyang respeto kanimo, kay buot pasabot dili ka masayon sayon ikama. Talagsaon ug pangitaonon ang sama nimo karong panahona.

Apan hangtod kanus-a man? Kinahanglan duna mo’y petsa, aron duna mo’y kadasig ug hinungdan nga kab-oton pag-abot sa panahon. Nindot imong patakaran nga sa dili pa manganak, kinahanglan establisado na mo’g andam para sa inyong amumahon nga pamilya. Responsable ka ug determinado. Apan sa laing bahin, ang pakighilawas maoy hingpit nga pisikal nga pamaagi pagpadayag sa gugma. Wala ka maghisgot kun birhen pa ka. Kun dili na, malikayan man ang pagmabdos, kun kana ra imong problema’g gikahadlokan. Daghan og contraceptives sama sa condom. Pero dili garantisado, duna’y gamay’ng purohan malutsan.

Kun sgarado Katoliko ka ug supak sa imong pagtuo ug konsensiya, mahimo gihapon ka mobalibad. Gitugot pud ang rhythm method, apan kun kamo kasado. Busa timbang-timbanga. Ayaw kalimti, ikaw ang tag-iya sa imong lawas, wala’y si bisan kinsa makabuot nimo kanus-a ka makighilawas.

Labi na’g birhen pa ka, ayaw isugal hangtod nga dili mo makasal. Mao na’y pinakanindot nga regalo nga mahatag nimo sa imong mabana ini’g kasal ninyo.  -Tito Miguel-

Magpatambag ka? Ipada kang Tito Miguel: 0991-318-9366