Masaganang ani raw pero mahal ang bigas
Pinakamasaganang ani ng palay sa kasaysayan nu’ng 2023, anang Department of Agriculture. Pumalo ito sa 20.06 milyon tonelada, kumpara sa 19.76 milyon nu’ng 2022 at 19.96 milyon nu’ng 2021.
Ang nabayo na bigas nu’ng 2023 ay 13.2 milyon tonelada. Kapos pa rin ‘yon sa kabuuang kain ng Pilipinas. Umangkat ang bansa ng 3.5 milyon tonelada pa mula Vietnam atbp. Sapat daw ang pinagsamang ‘yon sa konsumo ng mga Pilipino.
Kung sapat ‘yon, ito ang malaking tanong: bakit nagmahal ang bigas nu’ng Oktubre-Disyembre 2023? Pumalo ito sa P50-P56 kada kilo nu’ng Pasko. At nu’ng Enero ay naging P70-P75 sa Bicol at iba pang rehiyon. Karaniwan naman na mas malaki ang ani sa panahong ‘yon ng tag-ulan kaysa tag-init na Abril-Hunyo.
Maraming dapat gawin ang DA. Una, tayain kung tama ang mga numero mula sa Philippine Statistics Authority. Kung mali-mali ‘yon, mamamali rin ang mga plano at targets ng ahensiya. Reresulta sa maraming magugutom.
Ikalawa, bantayan ng DA ang mga nagaganap sa pagpapalay. Ehemplo: nagtriple ang presyo ng pataba nu’ng 2023. Dahil wala namang tulong mula DA, binawasan ng mga magpapalay ang sinasakang palayan. Natural bumaba ang ani. Kaduda-duda ang ulat na 20.6 milyong toneladang ani ng palay.
Ikatlo, tiyakin ng DA mula sa Customs bureau ang bulto ng angkat na bigas. Dalawang uri ‘yon: 10% basag na bigas, pangbenta sa palengke; 5% lang na basag, para sa restaurants. Dapat ‘yung angkat na pangpalengke lang ang ibilang ng DA para sa pangkalahatang konsumo. Sa ganun, malilinaw kung sapat ang supply para maging mura.
* * *
Makinig sa Sapol, Sabado, 8-10 ng umaga, DWIZ (882-AM).
- Latest