Hangga’t mga Pinoy hindi nagbabago
Sa mga gawaing kontra sa asenso;
Itong ating lahi, lahing Pilipino
Ay lalaging bigo sa pangarap nito
Hangga’t sa gawain nang maraming Pinoy
Hindi magbabago saan man naroroon-
Hanap na biyaya malayo na ngayon
Katawang lupaypay ay hindi babangon!
Hangga’t ang mayaman lalong yumayaman
At ang bawa’t isa’y di nagtutulungan;
Mga maralita nating mamamayan
Lalo pang sasadlak sa karalitaan!
Hangga’t ang gobyerno ay nagpapabaya
Mga pulitiko ay nagpapasasa;
Lalo pang sasagwa ang lagay ng bansa
Ating mamamayan lalo pang kawawa!
Hangga’t malakas pa sa ating gobyerno
Mga taong ganid habang nasa p’westo;
Mga taong tapat hindi magbabago
Laging nakalugmok at lulugu-lugo!
Hangga’t mga Pinoy hindi nangangarap
Na ang bayan natin bahagyang umangat --
Kuntento na lamang sa maling palakad
Itong ating bansa’y sasadlak sa hirap!
Hangga’t ang bukirin ay nakatiwangwang
Dahil hawak lamang ng mga mayaman;
Mga magbubukid ay di matulungan
Ang hinging patubig walang katiyakan!
Hangga’t itong ating mga mangingisda
ay pumapalao’t maliit ang bangka;
Ang ating gobyerno ay nakatunganga
Kinakain natin ay isdang bilasa!